• 
  
  Den e lista akibou bo por lesa ki alimentonan bo mester diariamente pa un nutricion completo. E porcionnan (cantidadnan) menciona den e lista ta un indicacion general. Consulta un dietista pa yudabo den bo caso specifico. Nos tur tin mester di bon nutricion. Ora di cancer, y tratamento di cancer, mayoria biaha tin cierto rekisito speciaal pa nos alimentacion. E alimentacion mester contene e nutricion esencial pa yuda mantene e condicion fisico lo miho posibel. Esaki ta importante pa por wanta e tratamento di cancer y pa e recuperacion despues di esaki. Principalmente ora cu bo no por come ‘normaal’, a causa di diferente motibo, ta bon pa purba otro alimentonan. Di cierto alimento mas cantidad ta necesario, manera alimentonan cu ta contene hopi proteina. Por ehempel lechi, producto di lechi, keshi, carni, pisca, galiña y webo.
• *Atencion tocante carni Carni ta contene proteina, vitamina y mineral manera hero. Door di esaki carni ta bon pa nos nutricion y recuperacion. Estudio cientifico ta mustra cu ora nos come hopi carni cora, y carni procesa, nos tin mas chens di haña cancer di tripa. Carni cora ta entre otro: carni di baca, porco, carne, y cabrito. Cu carni cora nos no kiermen carni manera steak cu no a wordo cushina bon. Cu carni cora nos kiermen tur sorto di carni cu di naturalesa tin un color cora. Carni procesa ta carni cu a wordo conserva door di wordo huma, seca, of pa medio di salo of substancianan di conservacion. Carni procesa ta entre otro: ham, bacon, salami, hot dog, rookworst y carni di bleki. Pero tambe hamburger di restaurant di fast food. Nos ta recomenda pa come te cu 350 – 500 gram di carni cora pa siman, y pa no come carni procesa of pa come esaki lo menos posibel. Durante cancer por ta util pa temporalmente come mas carni pa haya mas proteina cu bo mester. Despues di cancer bo mester baha man cu carni atrobe. Variacion Mayoria biaha ta bon pa varia cu alimento. Di e manera aki bo tin mas chens di haya e nutricion cu bo mester. Variacion ta dushi tambe. Principalmente ora bo tin dificultad pa consumi un alimento, purba un alternativa di e mesun sorto. Pan Si bo no por come pan, bo por substitui esaki cu beschuit, crackers (buscuchi), rijstwafel, muesli, corn flakes y papa (avena). Keshi Bo por come tur sorto di keshi riba pan. Si bo no por come pan, bo por come keshi apart. Tambe bo por raspa keshi pa come den sopi, saus of pasta. Beleg Bo por come tur sorto di beleg riba pan of apart. Salada di galiña of webo tambe bo por come riba pan of buscuchi manera beleg. Lechi y producto di lechi Ademas di lechi bo por scohe tambe pa chocomel, yoghurt, ijscream, smoothie of batido cu lechi y papa cu lechi. Fruta Si bo no por come fruta fresco, purba juice di fruta of fruta mula. Bo por come fruta riba pan tambe, of añadi fruta den un dessert. Berdura Ademas di berdura fresco bo por scohe pa berdura den bleki, pochi of gevries. Bo por añadi berdura den sopi, saus of salada. Tambe bo por traha juice di berdura. Carni, pisca, galiña, calacuna y webo Si no ta logra pa come un pida henter di e alimentonan aki, bo por purba di corta nan chikito of mula nan y mescla nan den un saus of sopi. Batata, pasta, aros y boonchi (legumbre) Bo por mescla e alimentonan aki den un salada. Pidi ayudo Pidi dokter pa e verwijs bo pa consulta un dietista cu ta specialisa den cancer pa bo haya conseho personal tocante bo nutricion. Fuente: Voedingenkankerinfo.nl, Wereld Kanker Onderzoek Fonds.