KWF ARUBA

Tocante mi mes y mi motivacion
pa yuda combati cancer:



  • Mi a crece den un famia afecta door di e impacto di cancer. Mi a lanta serca mi welonan materno door cu mi mama tawata den hospital frecuentemente. Mi welonan a perde nan prome yui, mi omo, door di cancer ora e ta tin apenas 14 aña. E suceso ey a laga un marca riba mi welonan y mama cu nunca mas a bay.
  • Desde mi prome memorianan mi ruman y ami a pasa hopi tempo den hospital cu nos mama. Nunca tawata diferente. Mi tawata drumi riba brancard serca nos mama den su kamber di hospital. E tawata pasa un paar di luna na cas, e resto di aña na hospitaal. Net ora mi a gradua na Colegio Arubano na 2000, nos mama tawata den hospital atrobe y nos tata mester a bay Hulanda - y despues België - pa un operacion. Tawata un periodo hopi dificil. Tur dos mayor malo, y e distancia entre Aruba y Hulanda ta grandi. Pero e golpi inespera ta cu nos welo, ken semper tawata mi sosten, a resulta di ta terminal na mesun momento. E a fayece den tempo cortico, locual a afecta mi bida por completo. Mi a haci un promesa cu lo mi dedica mi mes na combati cancer, cueste loke cueste. Tawata un di e promesanan mas importante cu mi a jega di haci. Tocante con mi conoce KWF Aruba: Desde cu mi tin memoria mi conoce KWF Aruba. Semper mi tawata wak e collectebus di KWF den e tienda chikito den hospital. E logo di e cangreu cu e espada den dje semper tawata capta mi atencion. Ora mi tawata studia na FEF/Universidad di Aruba, mi tawatin e keuzevak ‘Strategic management for non-profit organizations’. Pa un projecto pa e vak aki, mi a scohe KWF Aruba. Sra. Lily Prince a ricibimi cu braza habri na e oficina na Spinozastraat, pa splicami tur cos tocante e fundacion. Mi a aprecia esaki hopi, y semper e contact cu Lily e despues Lelicia tambe a keda hopi bon. Tocante Wereld Kanker Onderzoek Fonds y mi rol eynan: Wereld Kanker Onderzoek Fonds (abrevia WKOF) ta un fundacion na Hulanda estableci na 1994. Wereld Kanker Onderzoek Fonds ta specialisa den e relacion entre nutricion, actividad fisico, composicion fisico y cancer. E fundacion ta financia estudio cientifico y campañanan di concientizacion y educacion. Historicamente Wereld Kanker Onderzoek Fonds tawata enfoca riba prevencion di cancer pa medio di nutricion y estilo di bida saludabel. Pero desde 2016 e fundacion a amplia su area di trabou pa tambe enfoca riba nutricion serca pashent y ex-pashent di cancer. Cu entre otro e website Voedingenkankerinfo.nl e fundacion ta yuda hende cu tur pregunta tocante alimento y nutricion durante y despues di tratamento di cancer. Tambe cu consehonan practico tocante molesternan manera nausea, agotacion y cambio di smaak door di quimoterapia. E ayudo aki ta pa mehora e calidad di bida di pashent di cancer y yuda e pashent keda fuerte pa wanta e tratamento. Na 2011 mi a cuminsa traha na Wereld Kanker Onderzoek Fonds den e departamento di comunicacion. Despues mi a bira responsabel tambe pa e departamentonan di educacion (gezondheidsvoorlichting) y relacion publico. Durante e temporada di 10 aña di trabou mi a haya e privilegio di a desaroya diferente campaña y yuda defini e strategia di e fundacion.
  • Na 2015 Wereld Kanker Onderzoek Fonds a establece un bunita colaboracion cu KWF Aruba. Wereld Kanker Onderzoek Fonds ta comparti informacion cu KWF Aruba, manera resultadonan di onderzoek y consehonan practico tocante nutricion, actividad fisico, composicion fisico y cancer. Na 2015 KWF Aruba y Wereld Kanker Onderzoek Fonds a lanza campañanan di prevencion similar: Ban Preveni Cancer Hunto (Samen Kanker Voorkomen). Tocante e lintje biña: Wereld Kanker Onderzoek Fonds a introduci un lintje biña cu e texto ‘Kanker draag je niet alleen’ na 2017. Tur aña e fundacion ta mobilisa publico pa bisiti e lintje riba 4 di februari, dia mundial di cancer, como muestra di sosten y honor pa tur hende afecta door di cancer.
  • Germund Daal Hoofd doelrealisatie en communicatie Wereld Kanker Onderzoek Fonds